Blendi Klosi, ministri i Turizmit dhe Mjedisit është zgjedhur sot zv/ president i Asamblesë së Përgjithshme të UNWTO, organi më i lartë vendimarrës i Organizatës Botërore për Turizmin.

Për herë të parë nga anëtarësimi në 1993, Shqipëria do të përfaqësohet në organet drejtuese të UNWTO, agjenci kjo e specializuar për turizmin. UNWTO përbëhet nga 148 shtete dhe sesioni zgjedhor i Komisionit për Europën është mbajtur ditën e sotme në Zagreb të Kroacisë.

Shtetet pjesëmarrëse në votim kanë uruar Shqipërinë për postin e zv.presidentit të Asamblesë së Përgjithshme të UNWTO. Ky pozicion i Klosit, vjen pas angazhimit intensiv të Shqipërisë për rritjen dhe konsolidimin e turizmit shqiptar.

Kështu tashmë, përfaqësimi i Shqipërisë në organizatën Botërore të Turizmit, do të jetë një mundësi e mirë për rritjen e njohjes dhe prezantimit të Shqipërisë turistike në shumë vende të botës. Ministri Klosi do të drejtojë disa nga sesionet e takimeve ndërkombëtare për turizmin, që do të mbahen në mbledhjet e Asamblesë së Përgjithshme të UNWTO.